دكتور هيثم عز الدين خبير الضرائب ببساطة متي تستحق ضريبة القيمة المضافة و حساب ضريبة القيمة المضافة - انت والضرائب 2
- دكتور هيثم عز مستشار ضريبي ومحاضر معتمد فى الضرائب الدولية
- |
- 2019/02/04
نرجع تاني لمشكله الضريبه علي القيمه المضافة
كنت سالتني اخر مرة على ان كل الناس حتاخذ ضريبه القيمه المضافة من بعض وتبقى ليله يا معلم
طبعا لا دى ناس مميزة اللي مبيعاته حتوصل ٥٠٠٠٠٠جم يروح يطلع شهادة تسجيل في الضريبه علي القيمه المضافة في اقرب مامورية ضرائب للشركه بتاعته
شهاده ايه دي زي شهاده الميلاد كده يعني
ايوه بالظبط بس شهادة ميلاد انك اتولدت في الضريبه على القيمه المضافة بيبقي عليها عنوانك واسمك ورقم التسجيل اللي هو تسع ارقام وده رقمك في الضرائب
في سؤال كده مش انت قلت ان في حاجات كده مش بتحسب عليها ضريبه القيمه المضافة
تمام وصح جدا
في سلع زي السكر والشاي والقهوه مش النسكافيه خلي بالك الاتنين مش زي بعض النسكافيه خاضع وكمان اللحمه والخضار والفاكهة ولبن الاطفال وكل السلع الاساسيه لمعيشه الناس
لو شركة بتبيع حاجات من اللي ما بيتحسبش عليها ضريبه وحاجات بيتحسب عليها ضريبه يبقي طبعا لازم ياخد الحاجات اللي عليها ضريبه ولما توصل ٥٠٠٠٠٠ جم يروح شهادة الميلاد بتاعت الضرايب.
لا طبعا حضرتك حتحسب مجموع الاتنين ولما توصل ٥٠٠٠٠٠ جم تروح تطلع شهادة التسجيل انت فاكر حتعرف تضحك علينا انسي
فهمت طب ٥٠٠٠٠٠ جم دول في الايه في العنليه ولا كل موسم ولا ايه
تصدق حلو السؤال ده وعجبني
بص يا سيدي وركز شويه صغيرة
لو حضرتك وصلت للرقم ده فى يوم او شهر او سنه او عملت مصلحه وصلتك للرقم ده خلالالفترة الماليه بتاعتك تجري فورا تطلع شهاده الميلاد بتاعت الضريبه علي القيمه المضافة
معلش ارجع ورا شوية كده يعني ايه فترة ماليه
اقولكالفترة اللي بتبدى فيها تدور فلوسك اوبضاعتك لغايه الفترة اللي بتقفل فيها حساباتك وعاده ما بتكون السنه الماليه اللي بتبدي ١/١ وتخلص ١٢/٣١ اللي بتقدم عليها اقرار ضرايب الدخل
تمام قوى كده فهمت اول ما اي حد يوصل ٥٠٠٠٠٠ جم يجرى يسجل فى الضريبه علي القيمه المضافة.
لا معلش خد كده معلومة علي الماشي
في انشطة لازم يسجل في الضريبة علي القيمه المضافة من غير ما يوصل للرقم ده
زي اللي حيستورد سلعه او خدمهعلشان يبيعها ويكسب من وراها يعني بغرض الاتجار
وكمان اللي حيصدر منتج يعني بتاعت التصدير
وكمان وكيل التوزيع لاي سلعة او خدمه زي وكلاء العربيات والتكييف وكده
ومعلش علشان خاطرى زود المتعاملين فى سلع وخدمات الجدول سواء كان بينتجها او بيبيعها او بيستوردها
ايه هو ده اللغز اللي قولته ايه الجدول ده
انت تعبتني قوي المرة الجايه اقولك ايه هي سلع وخدمات الجدول في الضريبة علي القيمه المضافة
د.هيثم عزالدين
