الدكتور هيثم عز الدين خبير الضرائب يجيب علي رأي احد القراء الافاضل , بأن ضريبة القيمة المضافة هى نفسها ضريبة المبيعات مع تعديل نسبتها
- دكتور هيثم عز مستشار ضريبي ومحاضر معتمد فى الضرائب الدولية
- |
- 2019/02/09
جائنا رأي بعد نشر مقال الدكتور هيثم عز الدين خبير الضرائب لمقالة ضريبة المبيعات ببساطة ,من الاستاذ الكريم مدحت جمال الدين ان ضريبة المبيعات هيي نفسها ضريبة القيمة المضافة مع مع تعديل نسبتها
ونص الرسالة كالاتي
أستاذنا الفاضل
أنا شايف إن ضريبة القيمة المضافة هى نفسها ضريبة المبيعات مع تعديل نسبتها؟
هل تتفق معى فى ذلك أم لا؟
وإن لم تتفق معى فى ذلك فلتضرب لنا مثالا عمليا بالأرقام على ضريبة القيمة المضافة،
ونفس المثال على أنها ضريبة مبيعات مع تعديل نسبتها، ونرى النتيجة سويا لكى يطمئن قلبى
مع وافر الشكر والتقدير لشخصكم الكريم
ورد الدكتور هيثم علي الاستاذ مدحت جاء كالتالي
السيد الفاضل ا/ مدحت جمال الدين
سؤال حلو جدا وممتاز بصراحه وحجاوب بنفس اللغه المبسطة علشان غير المتخصصين يستفيدوا من الاستفسار
بص يا سيدي
اولا الضريبتين هم الاتنين ضريبه غير مباشرة وقلنا معني غير مباشرة في اول مقال وزيهم كمان الضريبة الجمركية وضريبه الدمغه
طب ايه هو بقي الفرق
بكل بساطة مش بس فئة الضريبه زى ما حضرتك قولت.
ضريبة المبيعات في مصر وخلي بالك من مصر لان تطبيقها مختلف في البلاد التانيه
كانت بتفرض علي كل السلع الا المعفي وخدمات التشغيل للغير زي المقاولات بس مش كل الخدمات
بس في القيمه المضافة كل السلع والخدمات خاضعين الاشويه سلع وخدمات تم اعفاؤهم بنص القانون
كمان في ضريبه المبيعات كان المسجل اللي بتعامل في السلع هو بس يقدر يخصم ضريبه المبيعات اللي دفعها علي مدخلاته المباشرة فقط انما بتاع الخدمات ملوش حق
انما في القيمه المضافة فكل واحد سواء كان بيتعامل في سلع او خدمات يخصم الضريبة السابق سدادها علي المصاريف المباشرة وغير المباشرة المتلقة ببيع السلعة دي او الخدمه.
ايوة يا استاذى سامعك وحاقول المثال اهو حالا
حنفرض ان شركة بتعمل خدمة اقامه حفلات واتعاقدت مع جامعه من الجامعات علي اقامة حفل تخرج بمبلغ ٥٠٠٠٠ جم
وعلشان الحفلة اجرت بالون حفلات ب٥٠٠٠ جم كمان اجرت معدات صوت ونظام اضاءة ب٣٠٠٠٠ جم ونقل المعدات ب ١٠٠٠ جم
في اقرا ضريبه المبيعات الشركة حتدفع
٥٠٠٠٠×%١٠=٥٠٠٠ جم
بس فى اقرار القيمه المضافة حيدفع
٥٠٠٠٠×١٤%=٧٠٠٠جم
ويخصم
٥٠٠٠×١٤%=٧٠٠ جم
وكمان يخصم
٣٠٠٠٠×١٤%=٤٢٠٠ جم
وكمان يخصم
١٠٠٠×١٤%=١٤٠ جم
يبقى اللي حيدفعه
٧٠٠٠-[٧٠٠+٤٢٠٠+١٤٠]=١٩٦٠ جم
وهو ده الفرق فى ايجاز
